22 ‘o Sanuali, 2019 ‘Oku kei hokohoko atu pē ‘a e ngäue ‘a e ngaahi kupu fekau’akí pea mo e palopalema ki he motuhia ko ia ‘a e fetu’utaki faka ‘initanetí talu mei he efiafi Sapate.
‘I he fakamatala kuo tuku mei he Potungäue MEIDECC na’e hoko ‘a e palopalema fakatekinikale ‘i he efiafi Sāpate, ‘o tupu mei ai ‘a e motuhia ‘a e fetu’utaki ‘a Tongá ni ki he ‘initaneti.
Ko e ongo kautaha fetu’utaki ‘e ua ‘i Tongá ni ‘oku ngāue’aki ‘e he kakai ‘o e fonua ke nau hū ki he ‘initaneti, ‘a ia ko e Digicel mo e TCC, ‘oku fou loua ‘a ‘ena fetu’utaki mo tu’apule’anga ‘i fo’i laine (fiber optic) ‘e taha ‘o ‘alu ai ki Fisi. ‘Oku te’eki ai ke fakapapau’i ‘i he taimí ni ‘a e tupu’anga ‘o e palopalema ko ‘ení, ka ‘oku mahalo’i ‘oku motu ‘a e fehokotaki (connection) mei Tongatapú ni ki Fisi pea pehe foki mei Tongatapu ki Ha’apai mo Vava’u.
Na’e ui foki ‘e he ‘Eiki Palēmia ha fakataha ‘i he pongipongi ‘o e ‘ahó ni ‘o kau atu ki ai ‘a e ngaahi kupu fekau’akí ke fakama’ala’ala ‘a e tu’unga lolotonga ‘oku ‘i ai ‘a e fetu’utaki ‘a e palopalemá ni pea mo e ngäue ‘oku lolotonga fakahoko ke fakasi’isi’i ‘a e uesia ki he kakai pea pehe ki he ngaahi pisinisi.
‘Oku ‘amanaki ke tu’uta ‘i Tongá ni ‘a e kau mataotao mei Fisi ke fai hono siofi mo fakapapau’i ‘a e tupu’anga ‘o e motuhia ko ‘eni. ‘E toki mahino leva mei ai ko e hä e lahi e taimi ‘e fiema’u ke solova ai ‘a e palopalema.
‘I he taimi tatau pē ‘oku fengäue’aki fakataha ai pē ‘a e TCC, Digicel, Tonga Cable, EziNet pea mo e Potungäue MEIDECC ki ha ngaahi founga ‘e lava ke fakahoko’aki ‘a e fetu’utaki fakataimí, lolotonga ‘oku fai ‘a e ngäue ki hono monomono ‘o e maumau ‘oku hoko.
Kuo ‘osi ngāue atu ‘a e ngaahi kautaha fetu’utaki ki hono fakahoko (connect) ‘a e ngaahi ngäue’anga mo e ngaahi sēvesi mafatukituki ‘oku ngäue’aki ‘e he kakaí ‘o fakafou ‘i he ‘initaneti.
‘E toki tuku atu ‘amui ange ha fakamatala mahino ki he tu’unga ‘e hoko atu ki ai ‘a e ngāue, hili ‘a e lipooti mei he kau mataotao mei Fisi ki he tu’unga totonu ‘oku ‘i ai ‘a e palopalemá ni.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea, mo e Fetu’utaki.