31 Sanuali, 2019 ‘Oku lele lelei pē ‘a e ngāue ki hono fakalelei’i ‘o e maumau na’e hoko ki he halanga ‘initaneti ‘oku ne fakafehokotaki ‘a Tonga ki Fisí ‘i he halanga ‘initaneti Southern Cross Network hili hono ma’u ko e ‘a e palopalema ne tupunga ai ‘a e mate ‘a e fetu’utaki ‘initaneti ‘i he laine keipoló.
‘I he fakamatala fakamuimui kuo ma’u mei he Pule Lahi ‘o e Kautaha Keipolo ‘a Tongá (TCL) Edwin Liava’a ‘oku lolotonga lele ‘a e ngāue ke hoko (splice) ‘a e fo’i laine keipolo ‘i he tafa’aki ki Fisí. ‘E kakato ‘enau ngāue ki aí pea ‘e foki mai leva ‘a e vaká ke hoko ‘a e fo’i laine keipolo ‘i he tafa’aki ki Tonga ni.
“Talu mei he 12 ‘anepo na’e kamata ai hono splice ‘a e fo’i keipoló, pea lele pē ‘anepo ‘o ‘aho. Na’e hoko atu ai pe ki hono tesi, ka ‘oku fakafuofua e a’u pē ki he houa ‘e fā mei heni pea kamata leva ‘a e fakatoká. ‘E hili ia pea temau foki atu ki he motu (cut) taupotu ki Tongá ‘o splice pea toki fai hono tesi.”
Na’a ne fakahā foki ‘oku a’u ki he houa ‘e 18 ‘a e loloa ‘o e taimi ke hoko mo tesi ‘a e foi laine keipoló. Ko e vaha’a taimi tatau pē ‘e fakahoko ai ‘a e ngāue ki he keipolo ofi mai ki Tonga ni kā ‘oku fakafuofua ‘e ki’i vave ange ia.
‘I he kakato ‘a hono hoko ‘a e ongo fo’i keipoló, ‘e fakafakafuofua ki he houa ‘e 10 ‘e toe tesi faka’osi ai ‘a e halanga ‘initanetí ke fakapapau’i ‘oku sai.
Hili ‘a e maau e ngāue ki he halanga ‘initaneti ki tu’apule’angá ‘e hoko atu leva ‘a e ngāué ki he halanga ‘initaneti ki he ‘otu motú.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, ‘Ōfisi ki hono Tokangaekina ‘a e Ngaahi Fakatamaki Fakaenatula, ‘Ātakai, Feliuliuaki e ‘Ea mo e Fetu’utaki.