19 ‘o Sepitema, 2019 Na’e fakaha’ele mai ‘i he pongipongi ‘o e ‘ahó ni ‘a e me’afaka’eiki ‘o e ‘Eiki Palemiá, Hon. Samuela ‘Akilisi Pohiva mei he ‘Ofisi Fakapule’anga St. George ki he Falelotu Senituli ‘o e Siasi Uesiliana Tau’ataina ‘o Tongá ‘i Nuku’alofa, ke fakahoko ‘a hono malanga’i.
‘I he ouau koení, na’e ‘afio ai ‘a e Ta’ahine Kuini, Kuini Nanasipau’ú pea mo Pilinisesi Lätüfuipeka Tuku’aho.
Na’e me’a ai foki mo e kau Hou’eiki Nopelé, kau Minisitä ‘o e Kapinetí, kau Fakafofonga Pule’anga Mulí, kau Takilotú, familí mo e kakai ‘o e Fonua.
Lolotonga ‘a e ouau lotú na’e fakahoko leva ‘e he Faifekau Fakatu’i pea mo e Palesiteni ‘o Siasi Uesiliana Tau’ataina ‘o Tongá, Rev. Dr. ‘Ahio ha popoaki fakamavae ki he Me’afaka’eiki ‘o e ‘Eiki Palemiá, Hon. Samuela ‘Akilisi Pohiva.
“Ko e ‘ahó ni ‘oku tau fakamavae mo e ‘Eiki Palemiá mo e tu’unga lea fakalangilangi koia ko e tangata ‘a e kakai. Na’á ne hoko ko e me’a kehekehe ki he kakai kehekehé, koe’uhí ke ne tokoni’i kinautolu pea fakahaofi kinautolu. Koia ai na’á ne fakapopula’i ‘ene mo’uí neongo ‘ene tau’ataina ki he kakai kehekehe. Ko e tangata ‘a e kakai, ‘oku fai ‘e he kakai ‘a e me’a kiate iá pea ‘oku ne fai ‘a e me’a ki he kakai pea ‘oku falala ‘a e kakai kiate ia. Ne luva kiai ‘ene mo’ui pea ‘aonga ki he kakai.”
“Na’e tali ‘e ‘Akilisi ‘a e tokotaha kotoa pé ke tokoni kiai, ko e tokolahi na’e fai ‘enau hanu mo e launga kia ‘Akilisi ke tokoni’i kinautolú kae tuku ‘a e ngaahi feitu’u totonu ia ke fai kiai. Pea na’e fai ‘e ‘Akilisi honau lotó, pea na’e ‘i ai hono ngaahi faingata’a ka na’e fua tokotaha pë ‘e ‘Akilisi kae hao pë kakai ia na’e fa’a launga mo hanu.”
Na’á ne pehe foki na’e lava ‘a e ngaahi ngäue lahi ‘a ‘Akilisi ki he kakai kehekehe he na’e loloa fe’unga pë hono nima ke ala atu ki he ngaahi tukunga kotoa pë na’e ‘i ai ‘a e kakai.
“Ko hono lotó na’á ne hanga ‘o fakaloloa’i hono nimá ke ala atu ki he tukunga kehekehe ‘o e kakai. Ne ‘ikai ko ha taha sino lahi mo kaukaua ‘a ‘Akilisi ka na’e lahi hono lotó. Na’e folahi hono fo’i mafu mo fakafefeka hono nimá pea ala fefeka atu ke tokoni’i ‘a e kakai ‘oku nau fiema’u. Na’e lava ‘e ‘Akilisi ‘o ‘ai fakapopula ia ki he kakai kotoa pea ne hoko ko e vaivai ki he kau vaivaí pea hoko ko e me’a kehekehe ki he kakai kehekehe.”
“Ko e iku’anga ia ‘o e ‘ai fakapopula ia ki he kakai kotoa pë mo ‘ene hoko ko e me’a kehekehe ki he kakai kotoa pë, ko e fakafofongá, ko e sevanití, ko e tala fekau. Ko hono iku’angá mo hono olá ‘oku ngäue’aki peia he kakai ke tau’olunga ‘o tuha ko e Palemia ‘o Tonga, te ne tala ‘a e fekau ‘oku fiema’u ‘e he pule’anga ki he fakalakalaka ‘o e Fonua. Toka ä ‘Akilisi ‘i he nonga mo e fiemälie ‘a e ‘Eikí.”
Hili ‘a hono malanga’í na’e fakaha’ele atu leva e Me’afaka’eikí ki Mala’e Telekava ko hono fakahekeheka.
Na’e fakafuofua ki he kakai ‘e lauafe ne nau fakatefua ‘i he Mala’e Telekavá ko ‘enau fiekaungämamahi mo fakahä ‘enau faka’apa’apa ki he ‘Eiki Palemia ‘o Tonga kuo pekiá.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki