11 ‘Epeleli 2020 Kuo fakapapau’i ‘e he Pule Lahi ‘a e Potungaue MEIDECC Paula Ma’u ‘i he Fakataha ‘a e Kōmiti Fakafonua ki he Ngaahi Me’a Fakatu’upāké na’e ‘ikai ha mo’ui ‘e mole ‘i he matangi mālohi ko ia ko Halotí.
Ko ‘ene fakahā eni ki he kōmití hili ‘a e lahi ‘a e ngaahi ongoongo ‘oku ‘ikai totonu kuo tuku hake ‘i he mitia fakasōsialé ‘o pehē na’e mole ‘a e mo’ui ‘i ‘Eua ko e tupu mei he Matangi Mālohi ko Halotí.
Ko e sino na’e ma’u ‘i ‘Eua ko e sino pē ia ‘o e tokotaha na’e ‘osi pekia ka na’e tafia tupu mei he malohi ‘o e matangí mo e hake ‘a e tahí ‘o tupu mei ai ‘a e maumau ‘a e ngaahi fa’itoka na’e ofi ki he matāfangá.
“Ko e talanoa ko ia ki he me’a na’e hoko ‘i ‘Euá na’e ‘osi ō pē ‘a e kāingá ‘o kofukofu’i ‘a e pekiá ‘o tanu fakalelei.”
“Na’e ‘i ai pe mo e fanga ki’i lavelavea iiki ka na’e ‘ikai ha lavea lahi ‘e lipooti tupunga mei he matangi malohi ko Halotí.”
NGATA’ANGA
Tuku atu mei he Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki.
