14 ‘Epeleli, 2020 Fakatapu ki he La’a Hopo ‘o e ‘Otu Felenité, King Tupou VI, Tapu Ki he Kuini ‘Ofeina ‘o Tonga, Kuini Nanasipau’u, Tapu ki he Hou’eiki Nōpele ‘o e fonuá, Fakatapu ki Ha’a Matāpule mo ha’a tauhi fonua, Fakatapu atu ki Ha’a Taki Lotu mo e si’i kau faka’olunga ‘o Tonga, kae pehē ki he tangata’ifonua mo e fefine’ifonua kotoa pē ‘o e ‘Otu Tongá, pea talangata hē ‘o fai ki tu’a mama’o, kae ‘atā ki he ‘Ofisi ‘o e Palēmia ke fakahoko hono fatongia fekau’aki mo e kaveinga ‘o e ongoongo ‘oku tuku atu.
‘Oku tokanga ‘a e ‘Ofisi ‘o e Palēmiá mo e ‘Ofisi ‘o e Kapineti, ke fakatonutonu ‘a e ngaahi fakamatala ‘oku ‘ikai totonu kuo tufaki ‘i he mitia fakasōsialé ‘o pehē kuo fakahoko ‘a e hiki vahenga ‘a e Hou’eiki Minisitā.
Ko e tukuaki’i ko ‘eni ‘oku ‘ikai ke totonu pea ‘oku ‘ikai ke fai ha hiki vahenga ‘a e kau Minisitā mo e Sekelitali Pule & Sekelitali ki he Kapineti, ‘o nau taki nima mano ($50,000) nai. ‘Oku fie fakahoko atu pē heni ‘oku ‘ikai ke totonu pea ‘ikai ke mo’oni ‘a e tukuaki’i ko ‘eni ‘o hangē ko ia kuo tufaki holo.
‘Oku ‘ikai pule ‘a e Kapineti ki he‘ene ma’u vahenga. Ko e sino fakalao ki he vahenga ‘a e kau ma’u mafai, ‘oku fakahoko ia ‘e he Lao ki he Ma’u Mafai Vahenga pea ‘oku ‘i ai ‘a e Poate ‘oku nau tokangaekina ‘a e ngaahi ma’u vāhenga ‘a e Pule’anga kae pehē ki he Fakamaau’anga mo e Falealea.
‘Oku ‘ikai ngata pe ‘i he ngaahi me’a ko ‘eni ka ‘oku kau ai mo e ngaahi me’a kehekehe ‘i he taumu’a hala mo fakatupumoveuveu.
‘Oku fie fakamanatu atu ‘a e tu’unga pelepelengesi ‘oku lolotonga fononga ai ‘a e fonua ni, mo e mahu’inga ke ‘oua e ‘ave holo ‘a e ngaahi fanongonongo ‘ikai mo’oni, hu’uhu’u ‘ikai ha fakamo’oni pau pe ko ha makatu’unga fakalao, he’e lava ke hoko ‘a e ngaahi me’a ni ke fakatupu moveuveu mo tala’a ki he fakakaukau ‘a e tokolahi. ‘Oku mahu’inga ange ke hokohoko lelei atu ‘a e nofo melino mo ma’uma’uluta ‘a e kakai, lolotonga ‘a e taimi ‘oku hoko ‘a e ngaahi me’a fakafokifaa ki he fonua, ‘i he mahaki faka’auha ‘o e covid-19 mo e ngaahi saikoloné. Tau fakamalō ‘oku ‘ikai mole ha mo’ui ka kuo mole ‘a e ngaahi koloa mo e ngaahi ‘api ‘o e ni’ihi pea ‘oku fiema’u ‘etau fetokoni’aki mo fepoupou’aki, ka ‘oku ‘ikai ko e fefusiaki mo e fakamatala ‘ikai mo’oni ke tukuhifo ha ni’ihi. Fiema’u ‘etau ngāue fakataha ke lava ‘e Tonga mo hono kakai ‘o matu’u’aki e ngaahi pole ko ‘eni.
Kole atu ‘a e mahu’inga ke ‘ave pē ‘a e ongoongo ‘oku totonu mo mo’oni, koe’uhí ke ‘oua ‘e taki hala’i ‘a e kakai ‘o e fonuá, pea fakatupu ai ha loto ‘ita mo taufehi’a ki he kau ma’u mafai.
Lolotonga ‘a e ngāue ‘a e Pule’angá mo e ngahi kupu fekau’aki ke fakaakeake mo tokangaekina ‘a e ngaahi maumau tupu mei he Matangi Mālohi ko Halotí, ‘oku fiema’u ke tau mateuteu ke ‘oua ‘e tali ‘a e ngaahi fakamatala ‘ikai mo’oni mo fakatupu moveuveu ki he nofo ‘a e kainga.
Hangē ko ia ‘oku tau fanongoa ma’u pe mei falelotu mo e akonaki mei ‘api, tau lototo’a, tu’u fakataha pea holoki mo e ‘ā vahevahe ke tali e ngaahi pole ‘o e mo’ui pea tau lotu ‘o hufia ‘a e fonua ‘i he taimi ‘o e faingata’a ni.
NGATA’ANGA
Tuku atu mei he: ‘Ofisi ‘o e Palēmia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644/24615/740 1351 Fax: (676) 23 888; Ngaahi Faka’eke’eke- Email: pressroom@pmo.gov.to Uepisaiti: www.pmo.gov.to