15 ‘o ‘Epeleli, 2020 ‘Oku tokanga ‘a e ‘Ofisi ‘o e Palēmia, ke fakatonutonu ‘a e ngaahi fakamatala ‘oku ‘ikai mo’oni kuo tufaki atu ‘i he mitia fakasōsiale ‘o pehē ko e vakapuna ‘Ea Nu’usila NZ970 ‘e tau mai he ho’ata ‘o e ‘aho ni ki he Mala’evakapuna Fua’amotu, ‘oku fakaheka mai ai ‘a e ngaahi naunau fakafaito’o ki he Covid-19 ‘a e Potungaue Mo’uí, pea ‘e folau mai ai ‘a e Tokoni Palēmia mo e Ta’ahine Kuini, ‘o fakatatau ki he fakamatala ne tuku mai ‘e Setita Tu’i’onetoa mei Nu’usila, mo e fakamatala na’a ne pehe na’e ‘oatu mei a Siaosi Pohiva mei Tonga ni.
Ko e tukuaki’i ko ení ‘oku ‘ikai ke mo’oni pea ‘oku ‘ikai ha taha pasese ‘e hifo mai he folau ko eni tukukeheange ‘a e ngaahi naunau fakafaito’o ki he Potungaue Mo’ui, na’e fakafou mai ‘i he alea mo e tokoni ‘a e Talafekau Lahi ‘a Nu’usila ki Tonga, ‘oku uta mai ai.
Ko e vakapuna ni ‘e folau atu ai ‘a e kakai nofo Nu’usila, ‘Amelika mo ‘Aositelelia, na’a nau tukuvakā ‘i Tonga ni, lolotonga ‘a e taimi fakataputapui fefōlau’aki ‘a e Pule’angá.
‘Oku fie fakamahino heni ‘oku kei tauhi pē ‘a e Pule’anga ki he’ene tu’utu’uni ki he fakataputapui ‘o e fēfolau’aki vakapuna mei tu’apule’angá mo ha pasese ke folau ‘o tu’uta mai ki Tonga ni, tukukehe ‘a e ngaahi fiema’u fakafaito’o ki he Covid-19.
‘Oku kole atu ki he kakai ‘oku nau angamaheni ‘aki hono tukuange ‘a e ngaahi ongoongo ‘oku ‘ikai ke mo’oni mo totonu, ke ‘oua mu’a ‘e taki hala’i ‘a e kakai e fonua, he ‘oku mahu’inga ‘a e nofo melino ‘a e fonua.
NGATA’ANGA
Tuku atu mei he: ‘Ofisi ‘o e Palēmia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644/24615/7401351 Fax: (676) 23 888; Ngaahi Faka’eke’eke- Email: pressroom@pmo.gov.to Uepisaiti: www.pmo,gov.to
