10 Tisema 2020 Kuo a’u eni e tokolahi ‘o e kakai Tonga kuo ‘osi fakafoki mai mei mulí ki he toko tahaafe uangeau tupu hili ‘a e tu’uta mai ‘a e ongo vakapuna ‘e ua he uike ni mei ‘Okalani, Nu’usila pea mo Nadi, Fisi.
Ko e vakapuna mei ‘Okalaní na’e tu’uta mai ki Tonga ni ‘aneafi, Tīsema ‘aho 9 pea mo e kau pāsesé mo e toko 129.
Ko e vakapuna mei Fisí ‘a ia na’e tu’uta mai ‘i he ‘aho ni mo e kau pasese ‘e toko 160, ko e tokolahi tahá ko e fānau ako mei he ‘Univesiti ‘o e Pasifiki Tongá.
Kuo a’u eni ki he vakapuna fakakātoa ‘e 12 kuo tu’uta ‘i Tonga ni ‘i hono fakafoki mai hotau kainga Tonga mei muli hili ‘a hono tāpuni ‘a e kau’āfonua (border).
Fokotu’utu’u ki he ngaahi vakapuna ‘i he ta’u fo’oú
‘I he ta’u 2021, ‘oku ‘i ai ‘a e palani ke tu’uta mai ‘a e fuofua vakapuná ‘i Sanuali, ‘aho 14 mo e kau pāsese fakafuofua ki he toko 280 mei ‘Okalani, Nu’usila.
Ko hono fakahā eni ‘i he fakataha’anga ‘a e Komiti Fakafonua ki he Ngaahi Me’a Fakatu’upakē (NEMC) ‘i he pongipongi ‘o e ‘aho ni.
Ko e vaka foki ‘i he ‘aho 14 ‘o Sanuali ‘e omi ai ‘a e ni’ihi ‘o e kāinga Tonga ‘oku nau tuku vakā ‘i ‘Aositelēlia pea mo e ni’ihi ne omi mei he ngaahi fonua kehe ‘o kolonitini ‘aho 14 ‘i Nu’usila.
‘Oku ‘i ai foki mo e fokotu’utu’u ke folau atu e vakapuna Lulutai ke fakafoki mai ‘a e fānau ako mo e ni’ihi na’e tukuvakā ‘e toko 21 mei Ha’amoa ‘a ia ‘oku palani ke tu’uta mai pē he ‘aho 14 ‘o Sanualí ai pē.
‘Oku palani foki mo e vakapuna ki Fepueli ‘aho 4 mo e ‘aho 25, ke ha’u pē mo ia mei ‘Aokalani Nu’usila.
‘I he taimi tatau ‘oku fakahoko foki ‘a e fokotu’utu’u ke ngāue’aki ‘a Kemi Taliai pea mo e Hōtele Kupesí ke fetukutuku ki ai ‘a e kau pāsese ‘oku lolotonga kolonitiní ‘o ka ‘ahia ‘e he saikolone ‘a Tonga ni, lolotonga e faha’ita’u afā 2020-2021.
NGATA’ANGA
Tuku atu mei he Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Ngaahi Fakatamaki, ‘Atakai, Feliuliuaki ‘o e ‘Ea mo e Fetu’utaki.