27 Sanuali, 2021 ‘Oku ta’emo’oni pea taki hala’i ‘e Mateni Tapueluelu mo Kalino Latu, na’e fakamolemole’i ‘e he Tangata’eiki Palēmia, Pohiva Tu’i’onetoa ‘a Mateni Tapueluelu hili hono tali e he Fale Alea ke tautea’i ko e lea ta’e faka’apa’apa ki he Palēmia, koe’uhí he na’e ‘osi pē ‘a hono fakama’u ‘o e lotu ‘aukai, pea nau hoko atu kinautolu ‘o inu mo papakiu. ‘Oku mahino ange ‘i he konga ‘o e fakamatala na’e lea fakapilitania ko e inu, ‘oku ‘uhinga ko e inu kavamalohi. ‘Oku ‘ikai ko ha tokotaha mama kava malohi ‘a e Tangata’eiki Palēmia ‘o hangē ko Mateni Tapueluelu.
Na’e launga’i faka- Falealea ‘a Mateni Tapueluelu ‘e Lord Nuku, ki he’ene lea ta’e faka’apa’apa ki he Tangata’eiki Palēmia ‘i he feme’a’aki ‘a e Fale Alea he ‘aho 13 ‘o ‘Okatopa 2020, ‘o pehē: “‘Eiki Palemia ‘oku ke mea’i ko e ngaahi pau’u ‘oku mou fai he fonua ni ko e fo’i pau’u kovi taha eni kuo mou fai ko ho’omou pau’u lotu ‘aki ‘a e ‘aukai pea ‘e mala’ia ai e fonua ni…. Ta’ofi ‘a e polokalama ko ia mo e kovi. Ko e takai holo ko’eni ko e Kemipeini…”
Na’e ‘ikai ‘asi tu’o taha he feme’a’aki ‘o e ‘aho 13 ‘o ‘Okatopa 2020 ha fakamatala ‘a Mateni, ko e ‘uhinga ‘oku ne pehē ai ‘oku pau’u lotu ‘a e Tangata’eiki Palēmia, ko ‘ene inu kava malohi ‘o hoko atu hili ‘a e fakama’u ‘o e lotu ‘aukai. ‘Oku tui ‘a e ‘Ofisi ‘o e Palēmia na’e mei kau ‘a e lea ko eni hono launga’i ‘a Mateni Tapueluelu ‘e Lord Nuku, kapau na’e ‘i ai ha’ane lea pehē ‘i he ‘aho 13 ‘o ‘Okatopa 2020.
Ko hono ‘uhinga totonu na’e fakamolemole’i ai ‘e he Tangata’eiki Palēmia ‘a Mateni Tapueluelu koe’uhí ko ‘ene fai mai ‘a e lea ta’etaau kiate ia fakahangatonu ‘o fakafo’ituitui, ‘o ‘ikai ki he pule’anga neongo ‘oku uesia ai mo e pule’anga ‘i he konga ‘o ‘ene lea ‘o pehe “„e mala‟ia ai „a e fonua”. Na’a ne fai pe ki he Palēmia ‘a e talatuki tatau ‘o ne pehē ‘e mala’ia, ‘i he’ene ‘imeili ki he Tangata’eiki Palēmia, hili ‘a e fili Palēmia ‘o e ‘aho 27 Sepitema 2019, pea na’e fakamolemole’i pe ‘e he Tangata’eiki Palēmia. Pea ko hono tu’o ua ‘eni ‘ene fai pehē.
Ka ‘oku fakahinohino ‘e he Folofola ‘i he Tohitapu ke te fakamolemole’i hoto fili ‘i ha’ane fai mai ha kovi fakahangatonu mai kiate kita fakafo’ituitui. Pea na’e tu’u pe ‘a e Palēmia ‘o kole ki he Fale Alea ke nau fakamolemole’i mu’a ‘a Mateni Tapueluelu, he ko ‘ene lea ta’efaka’apa’apa mo ‘ene talatuki ko ’ene fai mai pe ‘e ia ki he Palēmia, neongo ‘a e afuhia ai ‘a e fonua. Pea na’e tali ‘e Lord Nuku ke fakafoki ‘ene tohi launga, pea tali aipe ‘e he Fale Alea ke fakamolemole’i ‘a Mateni Tapueluelu koe’uhí ko e kole ‘a e Palēmia.
‘Oku ‘ikai ko ha tokotaha ‘a e Tangata’eiki Palēmia ‘oku mama kava malohi, talu pe mei fuoloa, pea toki fakanofo ia kimui ko e Faifekau. Pea koe tu’unga faifekau ‘i hono Siasi ‘oku tapu ke nau inu kavamalohi. Ko e konga Folofola eni na’e lau ‘e he Tangata’eiki Palēmia ke poupou ki he‘ene kole ki he Fale Alea, ke fakamolemole’i pe ‘a Mateni Tapueluelu, he ‘oku ‘ikai ke ne ‘ilo ‘a e kovi ‘ene me’a ‘oku ne fai, Loma 12:17-21.
“Neongo pe ko hai, ‘oua te mou totongi ‘ene kovi ‘aki ‘a e kovi. Mou tomu’a fakakaukau’i ho’omou ngaahi me’a ke hā lelei ki he kakai fulipe. Mou nofo melino pe mo e kakai kotoa pe, ‘o kapau ‘e ala lava: kehe pe ke ‘ata’ata meiate kimoutolu. Si’oku ‘ofa’anga, ‘oua te mou sauni ho’omou ngaahi me’a, ka e tuku ki he Houhau: he kuo tohi, ‘oku ‘a’aku ‘a e sauni: ko au te u ‘oatu hono tuha – ko e folofola ia ‘a e ‘Eiki. Ka ko koe, kapau ‘oku fiekaia ho fili ke ke fafanga ia; kapau ‘oku ne fieinua, ‘ange hano inu, he ko ho’o fai pehē te ke fokotu’u ai ‘a e ngaahi malala’i afi ki hono ‘ulu. ‘E ‘oua na’a tuku ke ikuna koe ‘e he kovi, ka ke ikuna ‘a e kovi ‘aki ‘a e lelei.”
Na’e fakamolemole’i ‘e he ‘Eiki Palēmia, Faifekau Dr. Pohiva Tu’i’onetoa, ‘a Mateni Tapueluelu, Fakafofonga Fale Alea ‘o Tongatapu Fika 4, hili hono ‘atamai’i ‘e he Fakafofonga ‘a hono ‘enisinia’i, ‘a e Tohi Faka’ilo ki he Ta’efalala’anga, ke fakahifo ‘a Faifekau Dr. Pohiva Tu’i’onetoa, mei he lakanga Palēmia, pea ‘ikai tali ‘e he Fale Alea.
NGATA’ANGA
Tuku atu mei he: ‘Ofisi ‘o e Palēmia, Pule’anga Tonga, Nuku’alofa, Tonga. Tu’asila: Taufa’ahau Road, P.O. Box 62.Tel: (676) 24 644/24615/7401351 Fax: (676) 23 888; Ngaahi Faka’eke’eke- Email: pressroom@pmo.gov.to Uepisaiti: www.pmo.gov.to