01 ‘o Tisema, 2021 Na’e fakahoko ‘i he ‘aho Mōnite ‘o e uike ni ‘a e fakataha ‘a e ‘Ōfisi ki he Ngaahi Fakatamaki Fakaenatula (NEMO) mo e kau Pule Fakavahe kae pehē ki he kau ‘Ōfisa Kolo felāve’i pea mo e Fa’ahi ta’u afā 2021/2022 ‘i he Fale Fakataha’anga Fā’oneluá.
Ko e fakataha ni na’e kau ki ai ‘a e Va’a Vakai Matangi ‘a Tongá, Potungāue Tāmate Afí mo e Me’a Fakafokifá mo e Potungāue Mo’uí.
Na’e fakahā ‘e he Pule Lahi ‘a e Potungāue MEIDECC Paula Pouvalu Ma’u na’e ‘osi tuku mai ‘e he Va’a Vakai Matangi ‘a Tongá ‘a e Fakafuofua ki he Fa’ahi Ta’u Afā 2021/2022 pea ‘oku fakafuofua ko e afā ‘e taha pe ua ‘e lava kene uesia ‘a Tonga ni.
Na’a ne fakamālō’ia foki ‘a e tokoni kotoa pē mei he kau Pule Fakavahé mo e kau ‘Ōfisa Koló hili ‘a Saikolone Halotí ‘i he ta’u kuo ‘osí.
“’Oku fakafalala ‘a e tānaki fakamatala ‘a e NEMO ‘i he fa’ahi ta’u afā ki he ngaahi fakamatala mei he kau Pule Fakavahé mo e kau ‘Ōfisa Koló pea ‘oku ou faka’amu ‘e tokoni ‘a e fakataha ni kiate kimoutolu ke toe fakalakalaka’i ange ai ‘a e tokateu ki ha saikolone.”
Na’e ‘i ai ‘a e ngaahi lea makehe (presentations) ‘i he fakatahá ‘o kau ki ai ‘a e Talēkita ‘a e NEMO Mafua-‘i-Vai’utukakau Maka, Talēkita ‘a e Va’a Vakai Matangi ‘a Tonga ‘Ofa Fa’anunu pea mo e fakafofonga mei he Potungāue Tāmate Afí mo e Me’a Fakafokifá mo e Potungāue Mo’uí.
Hili iá na’e faka’atā leva ‘a e kau ma’u fakataha ke nau talatalanoa felāve’i pea mo e ngaahi naunau tokoni ‘oku ‘i he NEMO pea mo e mahu’inga ‘o e ngaahi palani ‘a e koló (Village Emergency Management Plans) ki he tokateú.
NGATA’ANGA
Tuku atu mei he: Potungāue Fakamatala ‘Eá, Ma’u’anga Iví, Ma’u’anga Fakamatalá, ‘Ōfisi ki hono Tokangaekina Ngaahi Fakamatakí, ‘Ātakaí, Feliuliuaki ‘o e ‘Eá mo e Fetu’utakí