23 ‘o Sune, 2022 ‘Oku ‘amanaki ke fakahoko ‘apongipongi Falaite, 24 ‘o Sune ‘a e folouti fakafonua ko e poupou ki he teuaki va’inga ‘a e Timi Liiki Fakafonua ‘a Tongá ‘a ia ‘oku ‘iloa ko e Mate Ma’a Tongá pea mo e Timi Liiki Fakafonua ‘a Nu’usilá ‘i he efiafi Tokonakí ‘o e uike ni.
Fakatatau ki he Tokoni Pule Lahi ‘a e Potungāue ki he Ngaahi Ngāue Fakalotofonuá ‘a ia ‘oku fakamalumalu ai ‘a e Va’a Sipotí, ‘Onetoto ‘Anisi ‘e kamata ‘a e foloutí ‘i he taimi 12 ho’ata mei he mala’e ‘akapulu ‘a e Ako Mā’olunga ‘o Tongá.
‘E tataki ‘a e foloutí ‘e he ngaahi me’alele mei he Potungāue Polisí. ‘E mavahe mei he mala’e ‘akapulú ‘o takai ‘i he Hala Taufa’āhaú ki he Hala Vuná ‘o a’u ki he manga fā Uafu Kuini Saloté. ‘E afe leva ‘a e foloutí ki he Hala Bypass ‘o ha’u ai ‘o a’u mai ki he Hala Taufa’āhaú. ‘E fou fakatonga leva mei ai ki he Hala Niumeitolú ‘i he Falemahaki Vaiolá.
‘E foki ai pē ‘a e ngaahi me’alelé ki Hahake Lotoloto pea mo Hahake ka e afe ai pē ‘a e ngaahi me’alele ki Hihifó ‘i he ‘Ofisi ‘o e TASANOC ‘o fou ai ‘i he ‘Apiako Ocean of Light ke ma’u ‘a e Hala Hihifó pea ‘e foki mai leva ‘a e toenga ‘o e kau foloutí ki Nuku’alofa ‘o toki mātuku ai.
Na’e fakahā ‘e ‘Onetoto ‘e fakafuofua ke ‘osi ‘a e foloutí pea ‘atā e halá ‘i he taimi 3 efiafi.
“Ko e founga ‘o e kau mai ki he foloutí ‘e fiema’u ke lēsisita mai ki he Potungāue Ngaahi Ngāue Fakalotofonuó, ‘aki ‘a ho’o fetu’utaki mai ki he ongo fika telefoni ko eni 740-1039/ 740-1042.”
“Ko e fo’i lēsisita ‘e taha, ko e me’alele folouti pē ‘e tolu ‘e kau mai ki aí ‘o ‘ikai ke toe laka hake ai. ‘E tatau pē, kapau ko e lēsisita mai ha potungāue ‘e taha ko ‘enau me’alele folouti pe ‘e tolu ‘e fiema’u ke kau maí. Pe ko ha lesisita mai ‘a ha pisinisi taau taha ‘e fiema’u pē ‘a e me’alele ‘e tolu ‘o tatau ai pē, pe ko e pasi pe loli.”
Na’e tāpuni ‘a e lēsisita ‘i he taimi 2 efiafi ‘o e ‘aho ni.
“Ko e folouti ko ení ‘oku kau mai ki ai ‘a e Ongo Niuá, Vava’u Lahi, Ha’apai pea mo ‘Eua. Neongo na’e ‘osi kamata pē ia ‘aneafi ‘e he Ongo Niuá moe konga ‘o Vava’u ‘a e foloutí ka ‘oku kau kātoa pe ‘apongipongi ki he folouti fakafonua ko ení.”
Na’a ne tapou mai ai pē ki he kakai ‘o e fonuá, ‘a e “mahu’inga ‘a e poupoú mo e fiefiá, pea ‘oku toe mahu’inga pē foki ‘a e malu mo hao mei ha fakatamaki ‘e ala ‘o hoko.”
Ko e va’ingá ‘e kamata ia ‘i he taimi 5pm ‘a Nu’usila ‘a ia ko e 6pm ia ‘a Tonga ni ‘i he Mala’e Mt. Smart ‘i ‘Okalani, Nu’usila.
NGATA’ANGA
Tuku atu mei he: Potungāue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Ngaahi Fakatamaki, ‘Atakai, Feliuliuaki ‘o e ‘Ea & Fetu’utaki