16 Sepitema, 2016 Na’e fakaava ‘e he ‘Eiki Tokoni Palemia Siaosi Sovaleni ha fakataha ‘a e Pasifikí fekau’aki mo e mahu’inga ‘o e meí ‘i he pongipongi ‘aneafí ‘i he Nishi Trading Centre ‘i ‘Utulaú.
‘Oku fakafofonga’i mai ‘a e ngaahi fonua ‘o e Pasifikí ki he fakataha ni ‘e he Kautaha Faama ‘o e Pasifiki pe ko e Pacific Island Farmer Organisation Network (PIFON) ‘a ia ‘oku nau alelea fakataha ai mo e Kautaha Nishi Trading, Growers Federation of Tonga pea mo e Mainstreaming of Rural Developments Innovation Tonga Trusts (MORDI) ki he ngaahi ‘aonga ‘o e meí ki he’etau me’atokoni faka’aho, pehē ki hono faka’ai’ai ‘o e mo’ui leleí ke ne tau’i’aki e ngaahi mahaki ‘oku ‘ikai ke pipihí.
‘I he lea fakaava ‘a e ‘Eiki Tokoni Palemia na’a ne fakamamafa’i ai e mahu’inga mo e fakalakalaka ‘o e meí ki he ngaahi fonua ‘o e Pasifikí kau ai ‘a Tonga ni ‘o malava ke ma’u mo’ui mei ai hotau kakaí fakalotofonua kae pehē foki ki hono uta atu ki tu’apule’angá.
“Ko hono fakatolonga ko ia ‘o e meí ‘i hotau ngaahi fonuá kuo ne fakalelei’i ai e tu’unga mo’ui lelei fakame’atokoní ‘i he ngaahi ta’u lahi, pea ‘oku kau ia ha me’a mahu’inga ke tau tauhi pea fiema’u ke tupulaki.”
“”I he ‘aho ni kuo malava ke uta atu e meí ke lavemonū ai hotau kāinga ‘i tu’apule’angá. ‘I he ngaahi fika fakamuimui ki he lahi ‘o e mei kuo uta mei Tongá ni ‘i he 2007 ki he 2015, kuo hiki hake mei he kilo ‘e 80 ‘i he 2007 ki he toni ‘e 66.3 ‘i he 2015 kae lahi taha ange ‘i he 2013 ko e toni ‘e 100.7.”
“A ia ‘oku kau ki ai e mei kuo moho pe tuku ‘aisi ‘o fakataumu’a lahitaha ki Nu’usila. ‘Ikai ko ia pe ka ko e ola mei he savea fakafonua ki he ngoue 2015 na’e ha ai ko e meí ‘a e ‘akau fua lahitaha ‘oku to he ngaahi ‘apí.”
Na’a ne pehe foki ‘oku taa’imalie ‘a Tonga ‘i he’ene ngaue fakataha mo e National Tropical Botanical Garden ‘o Hauai’í ‘i he ngaahi ta’u lahi pea malava ai ke nau ‘omai e kalasi mei ko e “Puou” mo e “Kea” ke tö ‘i Tonga ni.
“Kuo hanga ai ‘e he Potungaue Ngoué ‘o fakamalohinga ‘a hono to ko ia ‘o e ongo kalasí ni ‘o tufotufa atu ki he kau faamá pea mo ako’i ‘a hono tauhi ‘a e kalasi meí ni.”
Ko e fakataha ni ‘oku malava ia ‘i he fengaue’aki fakataha ‘a e Potungaue Ngoue, Toutai, Me’atokoni mo e Vaotātaá ‘i he tokoni fakapa’anga mei he SPC Pacific Agricultural Partnership Program (PAPP) pea mo e polokalama Medium Term Cooperation Program II for Farmer Organisations in Asia and Pacific Regions (MTCP II).
NGATA’ANGA
Tuku atu mei he: Potungaue Fakamatala ‘Ea, Ma’u’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘a e ‘Ea mo e Fetu’utaki