13 ‘o Tisema, 2022 ‘Oku faka’amu e Polisi Tonga ́ ke tukuatu kuo ‘i ai e ola ‘o e fekumi na’e fakahoko ki he matāpule ta’u 35 ko Talanoa Leakona Lemoto mei Hala’ovave ́, neongo ko e ongoongo fakamamahi ki he fāmili ́ mo hono ngaahi maheni ́.
Na’e fakahoko hano ukufi e Uafu Tu’imatamoana ́ ‘i Ma’ufanga ‘i he ‘aho ́ ni, 13 ‘o Tisema 2022, pea ‘ilo ai e me’alele ‘a e tokotaha ́ ni ‘o malava ke ‘ohake ki ‘olunga ki ‘uta. Ne ma’u hake ai pē mo e matāpule ́ ni ‘i loto me’alele kuo ́ ne ‘osi pekia.
‘Oku ‘oatu ai e fakamālō ki he kakai ‘o e fonua ́ tautautefito kiate kinautolu ne tokoni mai ki he fekumi na’e fakahoko ́. Fakamālō foki heni ki he Kautaha Eco Reef Tonga ‘i ho’omou tokoni ki hono ukufi ‘o e pekia ́, pehē ki he fāmili ́ ‘i he tuku mai ho’omou falala ́ ki he ngāue na’e fakahoko ́. ‘Oku ‘oatu ai mo ‘emau fie kaungā mamahi ki he hoa ‘ofa’anga ‘o e pekia ́ mo e ki’i fānau ́ pea mo e toenga ‘o e fāmili ́ he po’uli kuo tō ‘i homou loto fale ́. Tauange mo e Pilinisi ‘o e Melino ́ ke ne ‘oatu ha fakanonga ki homou ngaahi loto ́ ‘i he taimi faingata’a ́ni.
‘Oku hoko atu ‘a e ngāue ‘a e kau Polisi ́ ke fakapapau’i ‘a e tupu’anga ‘o e mate ́.
NGATA’ANGA
Kātaki fetu’utaki mai ki he ‘Ofisi ‘o e Mītia ‘a e Polisi Tonga ́ ‘i he telefoni (676) 740–1625, ki ha’o fiema’u fakamītia.