3’o Epeleli, 2019 Na’e talitali lelei ‘e he ‘Eiki Minisita ‘a e Potungāue MEIDECCC ka ko e Minisita Le’ole’o ‘a e Potungāue ki he Ngaahi Ngāue Fakalotofonua (MIA) Poasi Mataele Tei ‘a e Ama ‘o e Melinó, pea ne toe kamata’i ‘a hono lele’i ‘o e amá ‘i he pongipongi ‘o e ‘aho ni ‘i mei he St George Palace.
Ko e fuofua taimi foki eni ke ‘omai ai ‘a e ama ko ení ki Tonga ni pea ko e polokalama lele’i ‘o e ama ni ‘a ia ‘oku ‘iloa ko e Lele ki he Melinó ‘oku ne fakafofonga’i ‘a e faka’amu ‘a e ngaahi fonuá ki ha kaha’u ‘oku toe leleiangé pea mo e melino ‘i māmani.
Fakatatau ki he fakamatala ‘a e Tokoni Talēkita ‘a e MIA ‘Onetoto ‘Anisi, “Koe toki fuofua taimi ‘eni ke takai mai ai e fo’i Ama ‘o e Melino ki he konga tahi ‘o e Pasifikí ‘a ia ne kamata’i mai mei Vanuatu, Tuvalu, Nu’usila pea na’a nau ‘i Ha’amoa pea nau ha’u ai ki Tonga ni.”
Na’a ne pēhē foki ko e fo’i ama ko ’ení ‘oku tutu ke huelo atu e melino ‘o ongo he taha kotoa.
“Ko e sipotí koe me’a ngāue ki hono ‘omi e melinó. ‘Oku tau fa’a to’o hala foki he taimi ‘e ni’ihi ‘etau ngāue’aki e sipotí ko ha me’a ia ketau tō kehekehe mo e fakafa’afa’ahi ka ko e taumu’á ia ke me’a ngāue ‘aki e sipotí ko e me’a ia ketau ma’u ai e melinó.”
Na’e lele’i ‘a e ama ni kamata mei he St. George ki he Kolisi ‘Api Fo’oú pea fou mai mei ai ki he Ako Tokamu’a Malia Tupu ‘i Makulatá, Lautohi Pule’anga ‘a Fasi-moe-Afí, Ako Mā’olunga ‘o Tonga, Ako Mā’olunga St Andrew’s pea toki faka’osi ki he Ako Mā’olunga ‘o Tupou ‘i Vaololoa.
‘E hoko atu ‘a e polokalama lele’i ‘o e amá ‘apongipongi ‘o kamata mei he Kolisi Tailulú, ‘Apiako Mā’olunga ‘o Liahoná, Kolisi Tongá, Kolisi Piula pea toki faka’osi ‘e he Kolisi ko Tupoú pea ‘e fakafolau ai pē ‘a e Ama ‘o e Melino ki Fisi ‘i he efiafi.
‘Oku fakafuofua ‘e fe’unga pea mo e māhina ‘e fā ‘e takai’i ai ‘e he ama ni ‘a e Pasifikí. Ko e toki fuofua lele’i foki eni ‘a e ama ni ‘i he ngaahi fonua kuo filí ke nau kau ki he polokalama ni ‘i he ta’u 2019. Ko e Lele ki he Melinó na’e kamata ia ‘i he ta’u 1987.
NGATA’ANGA
Tuku atu mei he: Potungāue Fakamatala ‘Ea, Mau’anga Ivi, Ma’u’anga Fakamatala, Tokangaekina Fakatamaki Fakaenatula, ‘Atakai, Feliuliuaki ‘o e ‘Ea mo e Fetu’utaki