04 ‘o Novema, 2020 ‘Oku faka’amu ‘a e ‘Ofisi ‘o e Palēmia ke fakama’ala’ala ‘a e ngaahi fakamatala na’e ha ‘i he Ongoongo ‘a e Kaniva Online he ‘aho ni, Tusite 3 ‘o Novema, ‘o pehe ko e ngaahi kautaha ‘oku nau fengaue’aki vaofi mo felave’i fakatoto mo e Pule’anga lolotonga, na’e foaki ki ai ‘a e faingamalie aleapau ngaue ki hono tanu ‘o e halá.
Na’e hā ‘i he faka’osinga ‘o e fakamatala ni ‘a e kupu’i lea” Na’e fakahā ‘e Hon. Tu’i’onetoa kuo seti ‘e he Pule’anga ‘a e totongi ko e T$70 ki he loli maka ‘e taha. (Hon. Tu’i’onetoa then said the government had set the price at TP$70 for each truck load).”
‘Oku faka’amu ke fakama’ala’ala heni, ‘oku fakahaofi (save) ‘e he Pule’anga ‘a e $120-$150 mei he loli maka ‘e taha mei he ngaahi kautaha ‘e tolu ko eni kuo foaki ki ai ‘a e faingamalie ke nau fakahoko ‘a e ngaue tanuhala. Ko hono ‘ai mahino ‘oku liunga ua ki he tolu ‘a e mahu’inga fakapa’anga na’e mei fua ‘e he Pule’anga, kapau na’e foaki ‘a e aleapau ngaue ki ha ngaahi kautaha kehe.
‘Oku ‘i ai ‘a e faka’amu ke toe mahino ange, ‘oku ‘ikai makatu’unga ‘a e faitu’utu’uni ‘a e Pule’anga ki he ngaue ni ‘i ha ‘uhinga felave’i fakatoto, pe fengaue’aki vaofi hange ko ia na’e hehema ki ai e fakamatala ko eni.
Ko e pa’anga lahi faufaua ‘oku malava ‘e he Pule’anga ‘o fakahaofi mei he tukuhau ‘a e kakai he tu’utu’uni fakapotopoto kuo fakahoko ‘e he Pule’anga.
Lolotonga ení, ‘oku faka’amu ‘a e Pule’anga ke fakapapau’i ki he kakai , ‘oku matu’aki tokanga ke tukuatu ‘a e ongoongo ‘oku mo’oni mo taau ke ‘inasi ai ‘a e fonua, pea ke ta’ofi ‘a hono tukuatu ‘o e ngaahi ongoongo ‘oku ‘ikai ke kakato, ke tataki hala’i ‘a e kakai ‘o e fonua.
NGATA’ANGA
Tuku atu mei he: ‘Ofisi ‘o e Palēmia, Pule’anga Tonga, Nuku’alofa, Tonga. Tu’asila: Taufa’ahau Road, P.O. Box 62.Tel: (676) 24 644/24615/7401351 Fax: (676) 23 888; Ngaahi Faka’eke’eke- Email: pressroom@pmo.gov.to Uepisaiti: www.pmo,gov.to